Odenseri buruz

Odense

Odense Danimarkako hirugarren hiririk handiena da. 187.000 biztanle ditu, eta horietako 22.000 60 urtetik gorakoak dira. Odense, gainera, Danimarkako Hego Eskualdeko hiririk handiena eta Fiona uharteko hiriburua da.

Odense oso hiri zaharra da, eta Burdin Aroan eta Bikingoen garaian du jatorria. Bi pertsonaia ospetsu jaio ziren bertan: Hans Christian Andersen ipuin-idazle entzutetsua eta Carl Nielsen konpositorea. Odensen, garrantzi berezia dute kulturak, negozioek, ikasle-bizitza sutsuak eta hainbat parke eta eremu berdek. Horiek guztiek oso giro polita ematen diote hiriari.

Odensek oso kontuan hartzen du bizikleta. 1999tik 2002ra, bizikleten hiri nazionala izan zen, eta gogor jarraitzen du lanean txirrindularitza bultzatzeko eta hirian giro atsegina, osasuntsua eta iraunkorra sortzeko.
 

Garraioaren egoera Odensen

Odensen ia bidegorri-sare oso bat dago, 550 km baino gehiagokoa, eta ehunka abiadura-murriztaile daude. Beraz, adin guztietan oinez eta bizikletaz ibiltzeko azpiegitura paregabea dauka.

1995etik aurrera, lekualdaketa txikienak egiteko gero eta gehiago erabiltzen da bizikleta, eta autoa, gero eta gutxiago. Lekualdaketa handiak egiteko, berriz, bizikletaren zein autoaren erabilera areagotu egin da. Hala ere, autoz bidaia luzeagoak egiten dira bizikletaz baino, eta autoa da nagusi udalerrian egindako bidaien kilometro kopurua kontuan hartzen bada. Garraio publikoa, bestalde, gero eta gutxiago erabiltzen da, bai bidaia luzeetarako, bai motzetarako.

2006an, bizikletaz egin ziren bidaien % 24 udalerrian egin zen, eta erdiguneetan bidaien % 50 egin zen. Garraio publikoa eta autoa % 6 eta % 47 erabili ziren, hurrenez hurren, udalerrian lekualdatzeko.
 

Odenseko garraioaren egoera etorkizunean

Aparkatzeko lau aldeak

Odenseko Zirkulazio eta Mugikortasunerako Plana harrera pubikoan egon zen 2008ko abendutik 2009ko otsailera. 2020ra begira garraioak nolakoa izan behar duen iradokitzen du planak. Planaren asmoa da bizikletaz egiten diren bidaiak % 35 areagotzea, garraio publikoan egiten direnak % 33 haztea, eta autoz egingo diren bidaiak % 16 murriztea. Zirkulazio eta mugikortasunerako planaren ondorio gisa, bide nagusi batzuk itxi egingo dira, baita Thomas B. Thriges Gade bidea ere, egunero 35.000 ibilgailu ibiltzen badira ere.

Ingurabideak

Gainera, hiriko erdigunea lau zirkulazio-eremutan banatuko da, eta ezingo da eremu batetik bestera gidatu. Horren ordez, gidariek saihesbidea erabili beharko dute. Zenbait aparkamendu-zerbitzu ezarriko dira ibilbidean zehar. Azkenik, abiadura-muga murriztuko da: 40 km/h aparkamenduko ibilbidean, eta 30 km/h ezartzea aurreikusten da aparkamenduko ibilbidearen barneko bizitegi-eremuetan.

Bi planoetan, lau zirkulazio-eremuak eta aparkamenduko ibilbidea eta saihesbidea ikus daitezke, hurrenez hurren (lerro gorriak saihesbidea adierazten du, eta lerro horiak, aparkamenduko ibilbidea).

Adinekoen mugikortasuna Odensen

Paseo atsegingarri bat bizikletaz Odensen

2007an, Odensek adineko pertsonekin eta mugikortasunarekin zerikusia zuten bi politika hartu zituen. 2007ko otsailean, Odenseko udalak Adineko Pertsonen Bizimodurako beste politika bat hartu zuen. Praktikan, beste politika horrek honakoa adierazi nahi du, besteak beste:

• Odensek lehentasuna emango die bizikleten eta oinezkoen loturei, bai eta inguruaren eta eremu berdeen kalitateari ere.

• Adineko pertsona ahulek eta urritasunak dituztenek eremu publiko, plaza eta kaleetan arazorik gabe ibiltzea bermatuko du.

• Bidegorriak eta oinezkoen bideak seguruak izango dira eta eguneko 24 ordutan ondo argiztatuta egongo direla bermatuko du.

Osasun-politikak kontuan hartzen du adineko pertsonen mugikortasuna, honako alderdi jakin hauetan:

• Fisikoki aktiboak diren hiritarren kopuruak hazi egin behar du.

• Guztiek izan behar dute ariketa fisikoa egiteko aukera, adina eta ahalmen fisikoa kontuan izan gabe.

• Hiritarrei buruzko erabaki onuragarriak hartzeko desioak eta erantzukizunak areagotu behar dute.

Osasunari buruzko eragin negatiboak saihestu egin behar dira, eta ingurumena zaintzeko ardura hartu behar da.

Gainera, Odensen, zerbitzuko autobusak 65 urtetik gorakoentzat dira. Zerbitzuko autobusek 5 ibilbide egiten dituzte herrian, eta ordutegia ondo antolatuta daukate, bidaiariak autobusera sartu-irtena egiteko denbora ere kontuan hartzen baita. Hala ere, zerbitzuak segurtasunari garrantzi handiagoa ematen dio ibilbidearen denborari baino, eta gidariek arreta handia ematen diete bidaiariei, beste autobus batzuekin konparatuta.

Odenseko jarduerak AENEASen

Odensen egiten diren AENEASko hiru jardueren bidez, adinekoak eguneroko bizimoduan oinez gehiago egitera eta bizikletaz gehiago ibiltzera bultzatu nahi ditugu.
Gainera, jarduerak adineko pertsonekin eta herriko zenbait elkarte eta erakunderekin eramango dira aurrera.

1. jarduera – Oinez egiteko kanpaina.
Lehenengo jarduerak oinez egitearen abantailak azalduko ditu. Adineko pertsonak oinez egitera animatzeko eta osasun publikoa bultzatzeko, adinekoak ardatz hartuko dituen kanpaina bat abiatuko da 2009ko irailetik 2010era. Kanpaina horren barnean, irteera bat antolatuko da adinekoentzat, kausa on baterako dirua biltzeko eta adinekoei eguneroko bizimoduan oinez egiteko aukerei eta oinez egiteak dituen abantailei buruzko informazioa emateko. Halaber, kanpainak eta irteerak ibiltarien elkarteen eta adineko pertsonen arteko lotura gisa funtzionatzea nahi dute.

2. jarduera – Mugikortasuna hirigunean.
Jarduera honen helburua oinezkoen mugikortasuna motibatzea eta bultzatzea da. Horretarako, hiriko auzoetan oinezkoen bi ibilbide jarri behar dira adinekoentzat. Jarduera hau erabilerraztasun planarekin lotu behar da; izan ere, Odense plan horretan dabil lanean 2009aren hasieratik.

3. jarduera – Gidatutako bizikleta-itzulia.
Jarduera honen bidez, txirrindularitza bultzatu nahi da adineko pertsonen artean. Horretarako, gutxienez, gidatutako 15 itzuli antolatuko dira, 200 bat pertsonentzat. Sei txirrindulari-kapitain aukeratu, eta entrenatu egingo dira, adineko txirrindulariei lagundu ahal izateko. Bizikleta-itzuliek zenbait gai izango dituzte; esaterako, segurtasuna, ariketa fisikoa eta bizikletaren mantenua, ahalik eta pertsona gehienengana iristeko. Zazpi itzuli egingo dira 2009ko apiriletik irailera, eta zortzi, 2010eko apiriletik irailera.

Informazio gehiago lortzeko eta gurekin harremanetan jartzeko:

Informazio gehiago lortzeko, sartu www.odense.dk web-orrian edo jarri harremanetan Kultura eta Hiri Garapenerako Departamentuarekin, Nřrregade 36-38, 5100 Odense C, Danimarka.

Odenseri buruz

Garraioaren egoera Odensen

Odenseko garraioaren egoera etorkizunean

Adinekoen mugikortasuna Odensen

Odenseko jarduerak AENEASen

Informazio gehiago lortzeko eta gurekin harremanetan jartzeko